Навуковы часопіс "Літасфера" заснаваны ў лістападзе 1994 г., што стала вялікай падзеяй у геалогіі Беларусі: у краіне з'явілася перыядычнае навуковае геалагічнае выданне, якім за 30 гадоў існавання пройдзены вялікі шлях.

Заснавальнікам і першым выдаўцом «Літасферы» быў Інстытут геалагічных навук АН Беларусі (№ 1–20, 1994–2004 гг.; пасля перайменаваны ў 2004 г. у Інстытут геахіміі і геафізікі НАН Беларусі, № 21–28, 2004–2008 гг.). Пасля, у выніку рэарганізацыі інстытута і перадачы яго ў падпарадкаванне Міністэрства прыродных рэсурсаў і аховы навакольнага асяроддзя, часопіс стаў выдавацца спачатку Беларускім навукова-даследчым геолагаразведачным інстытутам (№ 29–38, 2008-2013 гг.), а затым – рэспубліканскім унітарным прадпрыемствам «Навукова-вытворчы цэнтр па геалогіі» (пачынаючы з № 39, 2013 г. – па цяперашні час).

За час існавання ў часопісе апублікавана больш за 900 навуковых артыкулаў, якія ахопліваюць шырокі спектр геалагічных навук і прысвечаныя розным пытанням стратыграфіі і палеанталогіі, геатэктонікі і геадынамікі, агульнай і рэгіянальнай геалогіі, мінерагеніі, геахіміі, геафізікі, петралогіі і вулканалогіі, літалогіі, гідрагеалогіі, геаэкалогіі, інжынернай геалогіі, гісторыі і метадалогіі навукі, мінералогіі і крышталаграфіі, праблемам адукацыі.

Акрамя навуковых артыкулаў і кароткіх паведамленняў, у часопісе за 30 гадоў апублікавана мноства матэрыялаў, у тым ліку рэцэнзіі, хронікі важных падзей у геалагічнай навуцы і практыцы, таксама звесткі аб канферэнцыях, абароненых дысертацыях, памятных датах і інш.